“İmic insanın cəmiyyətdəki mövqeyidir”

“Modelyer- dizaynerliyə uşaqlıqdan marağım olsa da, təhsilimi bu sahə üzrə ala bilmədim.  Orta məktəbi bitirib ali məktəbə sənəd verən zaman qabiliyyət imtahanına hazırlaşmaq kimi şansım yox idi. Bu imtahan barəsində çox məlumatlı deyildim deyə, kəsilməkdən qorxdum və jurnalistikanı seçdim”.

Həmsöhbətimiz gənc modelyer-dizayner Səbinə Şirməmmədovadır. O, Bakı Slavyan Universitetinin Jurnalistika fakültəsinin məzunu olsa da, daha sonra dizayn kursunda iştirak edərək arzusunu reallaşdıra bilib. Onunla söhbətə əl işlərindən danışmaqla başladıq.

“Modelyer dizaynerliyə uşaqlıqdan marağım və həvəsim olub. 12 yaşımdan bəri eskiz çəkirəm, evdə qutu dolusu eskizlərim var. Əvvəllər, daha çox avanqard geyimlərin eksizlərin çəkməyə, onların üzərində işləməyə üstünlük verirdim, amma dizayn kursuna başladıqdan sonra, müəllimlərimin də verdiyi istiqamətdən başa düşdüm ki, əslində əsas olan gündəlik geyimləri hazırlamaqdır. Digər geyimləri hazırlamaq ancaq təxəyyül məhsuludur amma çətin olan, gündəlik geyimlərdir. Onları başqalarının əynində görə bilməkdir. Müəllim üçün şagirdin əldə elədiyi uğuru görmək necə qürur vericidirsə, mənim üçün də geyimlərimi kiminsə əynində görmək elədir”.

Səbinə xanım bizə iştirak etdiyi müsabiqələrdən, ilk təcrübələrindən də danışdı.

“İlk geyimlərim “Mersedes-Benz Fashion Week”də nümayiş etdirilib. Dörd gün davam edən nümayişdə hazırladığım bir neçə geyimi satdım. O vaxt satmağıma peşman olmuşdum, fikirləşdim ki, kaş satmazdım. Həmin geyimləri çox qısa müddətdə, böyük əziyyətlə hazırlamışdıq. Fikirləşirəm ki, çəkdiyimiz əməyə dəymədi. Həmin nümayiş bizim ilk təcrübəmiz idi deyə, çatışmayan cəhətlər olsa da, düşünürəm ki birinci dəfə üçün yaxşı idi və bəyənildi. Daha sonra, bir sıra yerli və xarici fotoqraflardan iş təklifləri aldıq.

“Qadın yanlız əlini əlinin üstünə qoyub oturan varlıq deyil”

“Dizaynerlər nəsə dizayn edəndə mütləq ki, öz üslubunu ora qatır. Məsələn, mən gündəlik geyimlərdə minimzalizmə üstünük verirəm deyə, bu, hazırladığım geyimlərdə də özünü göstərir. Ona görə, nəsə dizayn edəndə çalışıram ki, üslubu göstərim və müasir siluetə, müasir insan tipinə uyğunlaşsın. Məsələn, qadın ancaq incə geyinib əlini əlinin üstünə qoyub oturan varlıq deyil. Daha çox məşğul, işləyən varlıqdır və mən də çalışıram ki həmin detalları hazırladığım geyimlərdə ortaya qoyum.”

Belə bir deyim var – “İnsanı geyimi ilə qarşılayıb, ağlı ilə yola salarlar”. Səbinə xanımın fikrincə, elə geyim də, ağıl işidir.

“İnsana baxıb, geyimi ilə onun necə biri olduğunu müəyyən etmək olur. Geyim imicdir, imic də, insanın cəmiyyətdəki mövqeyidir. Ona görə də, insan özünə nə yaraşırsa, xarakterinə nə yaxındırsa, onu  geyinməlidir”.

Bu işdə sizin motivasiya mənbəyiniz nələrdir? sualına həmsöhbətimiz belə cavab verir:

“Mən birinci bu işə başlayanda məni həvəsləndirən, məşhur geyim brendlərinin moda nümayişləri olub. Modelləri, onların üzərindəki geyimləri görəndə ağlım başımdan gedirdi. Ümumiyyətlə, insanın nəyə marağı varsa, ora getməlidir. Məsələn, mən eskiz çəkəndə rahat oluram, sinirlərim sakitləşir. Uşaqlıqdan belə bir istəyim olub- Hansı sahədə oluramsa olum, çox yaxşı olum. Bəzən bu fikrimə görə məni qınayırlar, amma etiraf etməliyəm ki, içimdə biraz məhşur olmaq həvəsi də var. Həmişə öz gördüyüm işlə tanınmaq istəmişəm, özdə kiçik yox, böyük auditoriyada”.

“Atam deyir ki, bazara uyğun davran, pərdə tik”

“Bu sahəyə marağı olduğunu öyrənəndən bu yana, anam həmişə məni dəstəkləyirdi, indi də dəstəkləyir. Atam üçün  isə, eyni sözləri deyə bilməyəcəyəm. O, daha konservativ olub, onun üçün qadın modeli var. Əvvəl elə fikirləşirdi ki, keçici həvəsdir. Mənə deyirdi ki, sən moda sahəsində çətinlik çəkəcəksən. İndi artıq görür ki, bu həvəs işi deyil və bu məsələyə daha çox biznes tərəfdən yanaşır. Hərdən deyir, sən gəl bazara uyğun davran, pərdə tik (gülür)”.

Sonda gənc modelyer gələcək planlarından da danışıb:

“İlk olaraq bu sahə ilə bağlı təhsil almaq istəyirəm. Moda elə bir şeydi ki insanın içindən gəlməlidir. İnsanın içində yaradıcılıq yoxdusa, o sahədə heçnə edə bilməz. Düşünürəm ki, bu yaradıcılığı biliklə birləşdirmək lazımdır. Təhsil almasam, nələrsə mütləq yarımçıq qalacaq. Hələ, öyrənəcəyim çox şey var”.